Jan 26,2021 07:21

ఢిల్లీలో రిపబ్లిక్‌ డే ఉత్సవాలతో పాటు, లక్షలాది మంది రైతాంగం ఉద్యమిస్తూ లక్షలాది ట్రాక్టర్లతో ప్రదర్శన చేస్తుంటే...దేశ వ్యాప్తంగా రైతాంగ ఉద్యమానికి మద్దతుగా ఆందోళనలు జరుగుతున్నాయి. నూతన వ్యవసాయ చట్టాలు రైతుల ప్రయోజనాలను బలిపెట్టడమేకాక రాష్ట్రాల హక్కులు కూడా హరిస్తున్నాయి. 2014లో అధికారం లోకి వచ్చిన నరేంద్ర మోడీ ప్రభుత్వం గత ఆరేళ్లుగా ఒక పథకం ప్రకారం రాష్ట్రాల హక్కులు హరిస్తూ, భారతదేశ సమాఖ్య స్వరూపాన్ని దెబ్బ తీసి, ఏక కేంద్ర విధానంగా మార్చటానికి ప్రయత్నిస్తున్నది.
సమాఖ్య విధానం - రాజ్యాంగ నిర్మాతల అభిమతం
భారత దేశంలో గల భిన్నత్వం, బహుళత్వం దృష్ట్యా భారత రాజ్యాంగం సమాఖ్య విధానం కలిగి ఉండాలని రాజ్యాంగ నిర్మాతలు భావించారు. భారత రాజ్యాంగం సాధారణ సమయాలలో ''సమాఖ్య'' రాజ్యాంగంగా ఉంటుందని డాక్టర్‌ బి.ఆర్‌.అంబేద్కర్‌ ప్రకటించారు. సమాఖ్య విధానంలో లిఖిత రాజ్యాంగం, కేంద్ర-రాష్ట్రాల మధ్య అధికార విభజన ఉంటుంది. ఏక కేంద్ర విధానంలో అధికారాలన్నీ కేంద్రం వద్ద ఉంటాయి. రాజ్యాంగంలోని 1వ నిబంధన భారతదేశాన్ని ''రాష్ట్రాల యూనియన్‌'' అని ప్రకటించింది. అంటే, రాజ్యాంగం కేంద్రానికి, రాష్ట్రాలకు రెండింటికి ప్రాధాన్యత ఇచ్చింది. రాజ్యాంగం లోని 7వ షెడ్యూల్‌లో కేంద్ర, రాష్ట్రాల మధ్య అధికార విభజన జరిగి...కేంద్ర జాబితాలో 97 అంశాలు, రాష్ట్ర జాబితాలో 66 అంశాలు, ఉమ్మడి జాబితాలో 47 అంశాలు ప్రవేశ పెట్టారు. కేంద్ర జాబితాలో అంశాలపై కేంద్రం, రాష్ట్ర జాబితాలో అంశాలపై రాష్ట్రాలు, ఉమ్మడి జాబితాలో అంశాలపై ఇరువురూ చట్టాలు చేయవచ్చు. కేంద్ర, రాష్ట్రాల మధ్య వనరుల పంపిణీకి 280వ నిబంధన ప్రకారం ఆర్థిక సంఘాన్ని ఐదేళ్లకు ఒకసారి ఏర్పాటు చేస్తారు. ఇప్పటికి 15 ఆర్థిక సంఘాలు ఏర్పడినాయి.
పై అంశాలన్నీ భారతదేశం సమాఖ్య రాజ్యంగా ఉండాలని ప్రతిపాదిస్తున్నాయి. గతంలో శ్రీమతి ఇందిరాగాంధీ ప్రధానమంత్రిగా ఉండగా, రాష్ట్రాల హక్కులను హరించటానికి ప్రయత్నిస్తే, ఆనాటి ముఖ్యమంత్రులు జ్యోతిబసు, ఎన్‌.టి.రామారావు, రామకృష్ణ హెగ్డే, ఫరూక్‌ అబ్దుల్లా, ఇ.కె. నయనార్‌ వంటి వారు తీవ్రంగా ప్రతిఘటించారు. ఫలితంగా శ్రీమతి ఇందిరాగాంధీ ప్రభుత్వం కేంద్ర, రాష్ట్ర సంబంధాలలో మార్పులు సూచించటానికి సర్కారియా కమిషన్‌ను నియమించింది. ఈనాడు మోడీ ప్రభుత్వం భారత సమాఖ్య విధానంపై దాడులు చేస్తూ, కేంద్ర ఆధిపత్యం ఉండే ''ఏక కేంద్ర విధానం'' లోకి మార్చటానికి ప్రయత్నిస్తున్నది.
నూతన వ్యవసాయ చట్టాలు
గత పార్లమెంట్‌ సమావేశాలలో మోడీ ప్రభుత్వం ఆమోదించిన 3 వ్యవసాయ చట్టాలు సమాఖ్య విధానానికి పూర్తిగా విరుద్ధమైనవి. వ్యవసాయం రాష్ట్ర జాబితాలో 14వ ఎంట్రీలో ఉన్నది. వ్యవసాయంపై చట్టాలు చేసే అధికారం రాష్ట్రాలకు మాత్రమే ఉన్నది. కేంద్ర ప్రభుత్వం ఏకపక్షంగా రాష్ట్రాలతో చర్చించకుండా, అప్రజాస్వామికంగా పార్లమెంట్‌లో సమగ్ర చర్చ లేకుండా ఆమోదించింది. ఈ మూడు చట్టాలు వ్యవసాయ రంగాన్ని ఆదానీ, అంబానీ వంటి కార్పొరేట్ల పరం చేయటానికి అవకాశం కల్పించాయి. మార్కెట్‌ యార్డులు, ప్రజా పంపిణీ వ్యవస్థ, ఆహార భద్రత వంటి అంశాలన్నీ ప్రమాదంలో పడతాయి. మార్కెట్‌ యార్డులు, ప్రజా పంపిణీ వ్యవస్థలు కూడా రాష్ట్ర జాబితాలో ఉన్నాయి.
భారతదేశం వంటి విశాలమైన భిన్న వాతావరణం గల దేశంలో ఏ పంటలు పండించాలో స్థానిక పరిస్థితులను బట్టి రైతులు, రాష్ట్ర ప్రభుత్వాలు నిర్ణయించుకోవాలి. అయితే కొత్త చట్టాలు అమలు లోకి వస్తే అంతర్జాతీయ మార్కెట్‌ అవసరాలను బట్టి ఏ పంటలు పండించాలో కార్పొరేట్‌ సంస్థలు నిర్ణయిస్తాయి.
నూతన వ్యవసాయ చట్టాలు పూర్తిగా రాష్ట్రాల, రైతుల హక్కులు హరించటానికేనని ఆర్థిక శాస్త్రవేత్తలు, వ్యవసాయ శాస్త్రవేత్తలు ఉద్ఘాటిస్తున్నారు. వ్యవసాయ చట్టాల ద్వారా నరేంద్ర మోడీ ప్రభుత్వం రాష్ట్రాల హక్కులపై దాడి చేసింది.
నూతన విద్యా విధానం-2020
కేంద్ర ప్రభుత్వం ప్రకటించిన 'నూతన విద్యా విధానం-2020' ద్వారా కేంద్రీకరణ, వ్యాపారీకరణ, మతతత్వీకరణ (3 'సి' లు) జరుగుతుందని దేశ వ్యాప్తంగా విద్యావేత్తలు, మేథావులు, ఆందోళన వెలిబుచ్చారు. రాజ్యాంగ రచనా సమయంలో రాజ్యాంగ నిర్మాతలు 'విద్య'ను రాష్ట్ర జాబితాలో పొందుపరిచారు. 1976లో 42వ రాజ్యాంగ సవరణ ద్వారా విద్యను రాష్ట్ర జాబితా నుండి ఉమ్మడి జాబితా లోకి మార్చారు. ప్రస్తుతం విద్య కేంద్ర, రాష్ట్ర ప్రభుత్వాల ఉమ్మడి బాధ్యతగా ఉండాలి. కాని 'నూతన విద్యా విధానం-2020' ప్రకటించే సమయంలో కేంద్రం రాష్ట్రాలతో సంప్రదించలేదు. కరోనా సమయంలో ఏకపక్షంగా 2020 జులై నెలలో నూతన విద్యా విధానాన్ని ప్రకటించింది. నూతన విద్యా విధానంలో ప్రకటించిన అనేక అంశాలు విద్యపై కేంద్రం ఆధిపత్యాన్ని పెంచి కేంద్రీకరణకు దారి తీసే విధంగా ఉన్నాయి. విద్యను స్థానిక, దేశీయ అవసరాలకు కాకుండా, అంతర్జాతీయ మార్కెట్‌ అవసరాలకు అనుగుణంగా మార్చే ప్రతిపాదనలు వున్నాయి. యుజిసి వంటి సంస్థలను నూతన విద్యా విధానం ద్వారా రద్దు చేయటం దీనిలో భాగమే. డిగ్రీ కోర్సులలో మార్పులు, సిలబస్‌ తయారీ, జాతీయ స్థాయి పోటీ పరీక్షల నిర్వహణ...మొదలైన అంశాలన్నీ నూతన విద్యా విధానం ద్వారా కేంద్రం ఆధీనం లోకి వెళ్లనున్నాయి.
ఆర్థిక నిర్ణయాలు
నరేంద్ర మోడీ ప్రభుత్యం ఆర్థిక రంగంలో చేసిన అనేక నిర్ణయాలు రాష్ట్రాల హక్కులకు, అధికారాలకు శరాఘాతంగా మారాయి. జిఎస్‌టి, పెద్ద నోట్ల రద్దు, ప్రాయోజిత కార్యక్రమాలకు నిధుల తగ్గింపు, ఆర్థిక సంఘాల సిఫార్సులు మొదలైనవన్నీ దీనిలో భాగమే. 101వ రాజ్యాంగ సవరణ ద్వారా 'ఒకే పన్ను' పేరుతో జిఎస్‌టి విధానాన్ని ప్రవేశ పెట్టారు. 11 రకాల పన్నులను జిఎస్‌టి లో భాగంగా చేర్చారు. రాష్ట్రాలకు అత్యధిక ఆదాయం వచ్చే 'అమ్మకపు పన్ను' కూడా వీటిలో ఉన్నది. గత 4 సంవత్సరాలలో జిఎస్‌టి ద్వారా రాష్ట్రాలు సుమారు రూ. 2 లక్షల కోట్లు నష్టపోయాయి. నష్ట నివారణ చేస్తామని కేంద్రం ప్రకటించిన్పటికి, ఆచరణలో అమలుగాక, రాష్ట్రాలు ఆర్థిక ఇబ్బందులకు గురవుతున్నాయి. ఆకస్మికంగా పెద్ద నోట్లు రద్దు చేయడం వలన అసంఘటిత పరిశ్రమలు లక్షల సంఖ్యలో మూతపడి లక్షలాది మంది కార్మికులు ఉపాధి కోల్పోయారు. పెద్ద నోట్ల రద్దులో రాష్ట్రాలకు ఎటువంటి ప్రమేయం లేకుండా, నరేంద్ర మోడీ ఏకపక్షంగా చేశారు. ఇటీవల కాలంలో 15వ ఆర్థిక సంఘం సిఫార్సులలో రాష్ట్రాల పన్ను వాటను 42 శాతం నుండి 41 శాతానికి తగ్గించడం వలన రాష్ట్రాలు రూ. వేల కోట్లు నష్టపోయాయి. అంతేకాక 15వ ఆర్థిక సంఘం ప్రతిపాదనలకు 2011 జనాభా లెక్కలను ఆధారంగా చేసుకోవటం వలన దక్షిణాది రాష్ట్రాలకు తీవ్ర అన్యాయం జరుగుతున్నది.
రాజ్యాంగాన్ని, సమాఖ్య వ్యవస్థను రక్షించుకోవాలి
నరేంద్ర మోడీ ప్రభుత్వం సమాఖ్య విధానం పైనే కాకుండా, రాజ్యాంగ వ్యవస్థలు, సంస్థలపై కూడా దాడులు చేస్తున్నది. న్యాయ వ్యవస్థ, ఎన్నికల కమిషన్‌, యూనియన్‌ పబ్లిక్‌ సర్వీస్‌ కమిషన్‌ వంటి రాజ్యాంగ సంస్థలపై ఒత్తిడి తెస్తున్నది. ప్రపంచంలో భిన్నత్వం కలిగిన దేశంగా ప్రసిద్ధి చెందిన భారతదేశం సమాఖ్యగా కొనసాగడానికి, బహుళత్వాన్ని పరిరక్షించుకోవడానికి రాజ్యాంగం దోహద పడుతున్నది. రాజ్యాంగంలో ప్రవేశ పెట్టిన 'రిజర్వేషన్ల' ద్వారా సామాజిక న్యాయం కొనసాగుతున్నది.
రాజ్యాంగాన్ని, సమాఖ్య విధానాన్ని, రాష్ట్రాల హక్కులను సంరక్షించుకోవలసిన బాధ్యత ప్రజాస్వామ్యవాదులపై, రాజకీయ పార్టీలపై ఉన్నది. దేశంలో మారిన రాజకీయ పరిస్థితులలో ప్రాంతీయ పార్టీలు కేంద్రానికి అనుకూలంగా వ్యవహరిస్తూ, అవకాశవాద ధోరణితో ఉన్నాయి. ఆంధ్రప్రదేశ్‌లో అధికార పార్టీ వైఎస్సార్‌ కాంగ్రెస్‌ పార్టీ, ప్రతిపక్ష తెలుగుదేశం పార్టీ రెండూ వ్యవసాయ బిల్లుకు అనుకూలంగా ఓటు వేయడం దీనికి ఉదాహరణ. తెలంగాణ ప్రభుత్వం కూడా అవకాశవాద ధోరణితో వ్యవహరిస్తున్నది. ఇదే సమయంలో కేరళలో ఎల్‌డిఎఫ్‌ ప్రభుత్వం వ్యవసాయ చట్టాలకు వ్యతిరేకంగా అసెంబ్లీలో తీర్మానం చేయటం గొప్ప విషయం. ప్రాంతీయ పార్టీలు ధైర్యంగా వ్యవహరించవలసిన అవసరమున్నది. రాజ్యాంగాన్ని పరిరక్షించుకోవటానికి, సమాఖ్య విధానం-రాష్ట్రాల హక్కులు కాపాడుకోవటానికి, జాతీయ సమగ్రతను కొనసాగించటానికి...ప్రజాభిప్రాయాన్ని కూడగట్టి, ప్రభుత్వాలపై, పాలకులపై ఒత్తిడి తేవాలి. ప్రముఖ తత్వవేత్త రూసో చెప్పినట్లు ''ప్రజాభిప్రాయయే అన్నిటి కంటే బలమైనది''.
                                                                            (వ్యాసకర్త శాసనమండలి సభ్యులు, సెల్‌ : 94402 62072)
                                                                              - రిపబ్లిక్‌ డే సందర్భంగా -

ks