Jun 10,2021 20:08

ప్రజాశక్తి ప్రత్యేక ప్రతినిధి-అమరావతి : గోదావరి, కృష్ణా డెల్టాలలో ఇటీవలి కాలంలో అత్యంత ప్రాచుర్యం పొందిన 'బెంగాలీ వరి నాట్ల'కు వరుసగా రెండో ఏట కూడా కరోనా దెబ్బ తప్పేలా లేదు. సరిగ్గా ఖరీఫ్‌ వేళ వైరస్‌ సెకెండ్‌ వేవ్‌ వ్యాప్తి కొనసాగుతుండటం, లాక్‌డౌన్‌లు, కర్ఫ్యూలు అమలులో ఉండటంతో పశ్చిమబెంగాల్‌, ఒడిషా నుండి వలస కార్మికులు రాష్ట్రానికి వచ్చే అవకాశం లేదు. ఇదిలా ఉండగా, కరోనా తొలిదశ కారణంగా నిరుడు ఖరీఫ్‌లో 'బెంగాలీ నాట్లు' లేక వరి దిగుబడి తగ్గిందని, చిన్నపాటి వర్షాలకు సైతం పంట దెబ్బతిందని రైతులు చెబుతున్నారు. వరి ధాన్యం ఉత్పత్తి ముందటేడు కంటే నిరుడు 9 లక్షల టన్నుల మేర తగ్గిందని సామాజిక, ఆర్థిక సర్వే పేర్కొనడం గమనార్హం. పతి ఏటా నాట్ల సమయంలో బెంగాల్‌, ఒడిషా రాష్ట్రాల నుంచి వేల సంఖ్యలో వలస కార్మికులు ఉభయగోదావరి, కృష్ణా, గుంటూరు జిల్లాల్లోని డెల్టా ప్రాంతానికి వస్తుంటారు. కరోనా భయంతో నిరుడు వలస కార్మికుల రాక నిలిచిపోయింది. జనవరి ప్రాంతంలో పరిస్థితి కాస్త కుదుటపడిందనుకోగా రెండో దశ వైరస్‌ ఉధృతి తీవ్రమవడంతో ఈ సంవత్సరం కూడా వలస కార్మికులు వచ్చే అవకాశం లేదు.

పదేళ్ల ఆనవాయితీ
ఎప్పుడో తప్ప గోదావరి, కృష్ణా డెల్టాలలో సార్వా, దాళ్వా రెండు సీజన్లలో వరి సాగుకు నీటి గ్యారంటీ ఉంది. ఒక్క ఖరీఫ్‌లోనే సుమారు 20 లక్షల ఎకరాల్లో వరి పంట సాగవుతోంది. దాంతో బెంగాల్‌, ఒడిషాల నుండి ఇక్కడికి వలస కార్మికులు రానారంభించారు. వరి నాట్లు వాళ్లు మంచి నైపుణ్యంతో వేస్తారన్న పేరు డెల్టాలో స్థిరపడింది. నారుమళ్లు పోసి అప్పగిస్తే వారే నారు పీకి ఒక్కో మొక్క తీసుకొని తాళ్లు దారాలతో లైన్లు వేసుకొని క్రమ పద్ధతిలో నాటుతారు. ఈ ప్రత్యేక ప్రావీణ్యం వలన వరి కోతలు సులభంగా అవుతాయని, దిగుబడి సైతం ఎకరానికి ఐదు బస్తాలు అధికంగా వస్తుందని రైతులు చెబుతున్నారు. ఖర్చు సైతం తగ్గుతుందని, వేగంగా నాట్లు పూర్తవుతాయని అంటున్నారు.

ఈ ఏడాదీ అంతే
కరోనా లాక్‌డౌన్‌ పర్యవసానాలతో నిరుడు ఖరీఫ్‌ సమయంలో వలస కార్మికులు స్వస్థలాల నుండి కదలడానికి ఇష్టపడలేదు. సంవత్సరం తర్వాత కూడా పరిస్థితిలో మార్పు లేదు. మరోవైపు గోదావరి, కృష్ణా డెల్టా కాల్వలకు నీరు విడుదలవుతుందంటున్నారు. జూన్‌ ఆఖరు నుంచి జూలై, ఆగస్టు మొదటి వారంకల్లా నాట్లు పూర్తవుతాయి. ఇదిలా ఉండగా, 2020-21 ఖరీఫ్‌, రబీలో వరి సాగు ఆశాజనకంగా ఉంది. సుమారు 25.11 లక్షల హెక్టార్లలో సాగైంది. 133.26 లక్షల టన్నుల ధాన్యం దిగుబడి లభిస్తుందని ప్రభుత్వం అంచనా వేసింది. తొలుత వేసిన అంచనా కంటే ఇది దాదాపు 9 లక్షల టన్నులు తక్కువ. ఖరీఫ్‌ ఉత్పాదకత హక్టారుకు 5 టన్నులుగా మొదట అంచనా వేసి, తదుపరి 4.2 టన్నులకు కుదించారు. ఎకరానికి ఏడెనిమిది బస్తాల దిగుబడి తగ్గింది. ఈ నష్టం అధిక వర్షాలు, తుపాన్ల వల్లే కాకుండా, బెంగాలీ నాట్లు లేకపోవడం వల్ల కూడా అని రైతులు అభిప్రాయపడుతున్నారు.