డిజిటల్ యుగపు రోబోలు
వైరస్ పట్టిన నర సాఫ్ట్వేర్లు
అర్థం పర్థంలేని ఆరాటాలు
గమ్యమెరుగని గత్తర పరుగులు
ఆద్యంతమే లేని ధనదాహాలు
నైతికత ఇంకిన మర మనుషులు !
అశ్లీలతను ఆరాధించే నేత్రాలు
అబద్ధాలు ఆస్వాదించే చెవులు
తుమ్మ ముళ్ళను తలపించే స్పర్శలు
నరమే లేని నర నాలుక నర్తనలు
కంపుకొట్టే స్వార్థ కపట దుర్గంధాలు
పతనం అంచున పంచేంద్రియాలు !
విచక్షణ మరిచిన దురాలోచనలు
దురాశలతో వేలాడే ఊడలు
మర్యాదల వెనుక మతలబులు
ఈర్ష్యలు నిండిన ఇకమతులు
ఇరుగు పొరుగంతా పరలోకులు
చేయూతలు తరిగిన చేతులు !
బంధాలన్నీ వ్యాపార వస్తువులు
స్నేహాలన్నీ తేనె పూసిన కత్తులు
విత్తం వెంట వేలం వెర్రి పయనాలు
నరతోలు తొడుక్కున్న గుంట నక్కలు
నవ్వుల వెనుక వెర్రి ప్రతీకార జ్వాలలు
హితవరుల వేషంలో అసురులు !
అంతర్జాల సాగరమధనాలు
సాధించాలి స్మార్ట్ ఆణిముత్యాలు
నిర్మించాలి ప్రేమల పొదరిల్లు
చేరాలి ఆనందపు అంచులు
వికసించాలి నవ్వుల పువ్వులు
పరిమళించాలి వసుదైక కుటుంబాలు !
చిగురించాలి మానవీయతలు
నాటాలి అంతటా అవినీతి విత్తులు
చెరపాలి అవాంఛనీయ గోడలు
విలువలతో వర్ధిల్లాలి ఆత్మీయతలు
ఇంటర్’నెట్’ అల్లాలి అనుబంధాలు
నరులు కావాలి నారాయణులు !
- మధుపాళీ – 9949700037