గాయం కనబడదు
రక్తం అసలు చిందదు
నొప్పి అదాటున
నరనరాల్లోకి పాకి
హృదయాన్ని మెలి పెడుతుంది
నీ ఫోన్ సంభాషణ
తలను భూమిలోకి తొక్కేస్తుంది
లేకి మాట
గొంతెత్తి గుచ్చుతుంది
వేలెత్తి చూపుతుంది
అదాటున మీట నొక్కి
కారుచవకగా ఏదో దొరకబుచ్చుకుందామనే
ఆలోచన నీది
మాటల మంత్రదండం ఊపి
పలుకులకు పంచదార అద్ది
వలలో చేపపిల్లను
సునాయాసంగా పట్టాలనే ఆరాటం నీది
అక్కడొక అనుమానపు తాళి
చూపులతో గుచ్చి గుచ్చి చంపుతుంది
ముళ్ళ దండతో
ఉరేద్దామని కాపు కాస్తుంది
కాపురంలో మరొక భూకంపానికి
తెర లేస్తుంది
నీకు ఇదంతా ఆటపాటల మధ్య
మీసం మెలేస్తూ చేసే
సరదా సరదా చెలగాటం
ఇక్కడ కలం ఎత్తి
మనసులోని భావాలను మధించి ఒంపినందుకు
ప్రాణసంకటం
వాక్యం భుజం మృదువుగా తట్టే
ఆత్మీయ స్పర్శ కోసం
అక్షరాలను కళ్ళలో వేసుకునే
మురిపెం కోసం ఎదురు చూస్తూ
కవిత కింద ఫోన్ నంబర్
అమాయకంగా వేళ్ళాడుతుంది
కానీ, అది నీకు
ఆహ్వాన పత్రికో ఎర్ర తివాచీనో
కానే కాదని గుర్తుంచుకో
అయినా అడుగు ముందుకేసి
అదే దారిని అనుసరిస్తే
పాళీని కత్తిగా తర్జుమా చేసే శక్తి కూడా
ఇక్కడుందని గమనించుకో!
– పద్మావతి రాంభక్త
99663 07777