అమ్మమ్మ కొట్టిందని నాన్నమ్మను చేరిన
అమాయకత్వం మనది
ఏదో కావాలని
ఇంకా ఏదో పొందాలనే తపనతో
ఒక్క ఛాన్స్‌, ఒక్క ఛాన్స్‌ అన్న
ప్రతి ఒక్కరినీ..
ఒడిని చేర్చుకునే పెద్ద మనసు మనది !
తప్పులందు మన తప్పులెన్నక
ఆడే వైకుంఠపాళీ మన రాజకీయాలది
వరించిన పదవిని ఒడిసిపడతారు
విశ్వరూపం చూపిస్తారు !
వారు, వీరు అని తేడా లేక..
గద్దెనెక్కేంతవరకు సేవకుడిని అంటారు
గద్దెక్కినాక మనపై ఎక్కి
స్వారీ చేస్తుంటారు
నిన్న, నేడు, రేపు తేడా లేదు
వచ్చేవారు వస్తున్నారు దేశసేవ పేరిట
దోచేవారు దోచుకుంటున్నారు
నలిగిపోయేది మధ్యతరగతి
మానవుడు ఒక్కడే !
పథకాల పేరిట ఎరవేసి
బానిసత్వాన్ని వారసత్వంగా చేసి
బడా బాబుల బంగ్లాకు దిష్టిబొమ్మలై
ప్రతిపక్షం లేని చదరంగాన్ని
ఆడుతున్నారు !
పచ్చనోటు చూసి పడగ తొక్కారు
సానుభూతిలో సగం మునిగారు
బండరాయిని దించాలనుకుని
గుదిబండని
నెత్తికెక్కించుకున్నారు
మేలు మాట దేవుడెరుగు..
కోల్కోలేని దెబ్బ తగిలి
విలవిలలాడేరు !
ఒక్కసారి ఆలోచించండి !
రాజ్యాన్ని పంచుకొనే దాయాది లేనప్పుడు
తాను చేసిందే శాసనమని
రాజు విర్రవీగుతాడు
తన ఉనికికి ముప్పు ఉందని తెలిస్తే…
ప్రజలను ఆశ్రయిస్తాడు
ప్రజాభిమానాన్ని కోరుకుంటాడు
ప్రజా శ్రేయస్సుకు కాస్తయినా
ఆలోచిస్తాడు !
పోటీలేని రాజు పోతల గిత్తై
ఎగిరెగిరి పడతాడు
ప్రజల అండే తనకు రక్ష
అని తెలిసేలా చేద్దాం
ఆలోచించి అడుగు ముందుకు వేద్దాం
మన దేశాన్ని మనమే కాపాడుకుందాం !! – జ్యోతి మువ్వల 90080 83344
