సుప్రీంకోర్టు ఆదేశం
ఢిల్లీ : 8 కోట్ల మంది వలస కార్మికులకు రేషన్ కార్డులు ఇవ్వాలని రాష్ట్రాలు, కేంద్ర పాలిత ప్రాంతాలను సుప్రీంకోర్టు ఆదేశించింది. ఈ-శ్రమ్ పోర్టల్‌లో నమోదైన ఎనిమిది కోట్ల మంది వలస కార్మికులకు జాతీయ ఆహార భద్రతా చట్టం పరిధిలోకి రాని వారికి రేషన్ కార్డులు అందించాలని ఏప్రిల్ 2023లో జారీ చేసిన ఉత్తర్వుల అమలులో జాప్యంపై మంగళవారం సుప్రీంకోర్టు విచారణ చేపట్టింది. పోర్టల్‌లో 28.6 కోట్ల మంది రిజిస్టర్లు ఉన్నారు. ఇందులో 20.63 కోట్ల మంది రేషన్ కార్డు డేటాలో చోటు దక్కించుకున్నారు. ఈ-శ్రమ్ పోర్టల్‌లో నమోదు చేసుకున్న మిగిలిన ఎనిమిది కోట్ల మంది వలస మరియు అసంఘటిత రంగ కార్మికులకు రెండు నెలల్లో రేషన్ కార్డులు అందించాలని జస్టిస్ హిమా కోహ్లీ నేతృత్వంలోని బెంచ్ రాష్ట్రాలు, కేంద్ర పాలిత ప్రాంతాలను ఆదేశించింది. ఉద్యమకారులు అంజలి భరద్వాజ్, హర్ష్ మందర్, జగదీప్ చోకర్ తరఫు న్యాయవాదులు ప్రశాంత్ భూషణ్, చెరిల్ డిసౌజా లేవనెత్తిన వాదనలపై కోర్టు విచారణ చేపట్టింది. 2011 జనాభా లెక్కల ఆధారంగా ఆహార భద్రత చట్టం యొక్క రక్షిత గొడుగు వెలుపల 10 కోట్ల కంటే ఎక్కువ మంది కార్మికులు మిగిలి ఉండవచ్చని శ్రీ భూషణ్ వాదించారు. ప్రతి వలస కార్మికుడిని రేషన్ కార్డు జాబితాలో త్వరితగతిన చేర్చడం సంక్షేమ రాజ్యం యొక్క విధి అని కోర్టు గత సంవత్సరం పేర్కొంది.
