మీరేమిటోల్లురా ?
దళితులమయ్యా !
అంటే, ఎందులో వస్తారూ ?
మీ తిట్ల్లల్ల ఒస్తం
మురికి కాలవల్ల ఒస్తం
విడిగా పెట్టిన కంచంల ఒస్తమయ్య
అంటే-హిందువులు కారా ?
ఎందుకు కాం దొర-అయితం
-మీ ఎలక్షన్‌ లెక్కలల్ల అయితం !
ఏం తింటార్రా మీరూ ?
దళితులు తినేవన్నీ తింటం నాయిన
అవే, ఏమేం తింటరు ?
మీతో దెబ్బలు తింటం
అప్పుల బాదలు తింటం
మీ తొక్కిసలాటల, మేం తన్నులు తింటం,
ఎప్పుడన్న మీరేశిన తొక్కు దింటం -బాంచెన్‌ !
కోళ్ళు తింటరేమో ననుకున్నారా ?
తింటాం గద దొర ! మీ ఎలక్షన్‌ టయిముల-
ఏమేం తాగుతర్రా మీరూ ?
దళితులు తాగేవే తాగుతమయ్య
అవే – ఏమిటవి ?
అంటరాని నీల్లు తాగుతం
ఇరిగిన కోర్కెల ఇషం తాగుతం
రేపనేది లేని చీకటి తాగుతం
బీరు-బ్రాంది తాగుతారేమోననుకున్నారా ?
తాగుతం కద నాయిన -మీ ఎలక్షన్లప్పుడు-
మీకేం దొరుకుతయిరా ?
దళితులకు దొరికేవన్నీ దొరక్తయి దొర
అంటే-అదే ఏమేం దొరుకుతయి ?
మీరు ఒదిలేసిన మురికి
ఊరొదిలేసి చివరికి
అందుకున్న కొసప్రానాలు ఉరికి
అదేమిటీ ? ఆశలేవీ దొరకవా ?
దొరుక్తయి కద దొర-మీ ఎలక్షన్లప్పుడు-
ఇంతకీ మీరు చేసిన పనేంట్రా ?
దళితులు చేసే పనులన్నీ చేశినం దొర
అదే-ఏమేం చేశారు ?
వంద రోజులు చెరువు పని చేశినం
మా చెమటల్తో దాన్ని నింపేశినం
పగలంత పని చేసి, దాన్నే రాత్రి చేసినం
రాత్రంత పని చేసి, దాంతోనే పొద్దు పొడిపించినం
అవునా ? ఇంకేమేం చేశార్రా ?
ఆ దారిన ఒచ్చిపోయే మీ దొరలందరికీదండాలు పెడ్తం కద నాయిన ?
అంతేనా ? ఇంకా ఏదో పెద్ద పని చేశారనుకున్నానే ?
చేశినం కద దొర-మీ ఎలక్షన్‌ ప్రచారం !
అంతకు మించి మాకు, మరో పెద్ద పనేముంటదయ్యా
బాంచెన్‌ నీ కాల్‌ మొక్త… హిందీ మూలం : బచ్చాలాల్‌ ఉన్మేష్‌ తెలుగు :డా|| దేవరాజు మహారాజు
