చిన్న కార్ల తయారీ దిగ్గజం మారుతి సుజుకి ఈ ఆర్థిక సంవత్సరంలో ఎగుమతులు రెట్టింపును పెంచుకొనే క్రమంలో ఉన్నట్లుగా సోమవారం ప్రకటించింది. గత ఆర్థిక సంవత్సరంలో 80వేల యూనిట్లను ఎగుమతి చేసిన మారుతి ఈ ఆర్థిక సంవత్సరంలో 1.6 లక్షల యూనిట్లను ఎగుమతి చేసే దిశగా పనిచేస్తున్నట్లు కంపెనీ ఎగ్జిక్యూటీవ్‌ ఆఫీసర్‌ మార్కెటింగ్‌, సేల్స్‌ మయంక్‌ పరేఖ్‌ విలేకరులకు వివరించారు. ముఖ్యంగా ఎగుమతులు అత్యధికంగా పెరగటానికి ఉపకరించిన ముఖ్యమైన అంశంగా ఎ-స్టార్‌ మోడల్‌ను తెలిపారు. దీనిని విడుదల చేసిన పదకొండు నెలల కాలంలోనే ఒక లక్ష యూనిట్లను విక్రయించగలిగామని వివరించారు. వచ్చే ఆర్థిక సంవత్సరంలో రెండు లక్షల యూనిట్లను ఎగుమతి చేయగలమనే లక్ష్యాన్ని కూడా తెలియజేశారు. ఈ ఆర్థిక సంవత్సరంలో మొత్తంగా అమ్మకాలు 20 నుంచి 22 శాతానికి పెరుగుతాయని పేర్కొన్నారు. ఇప్పటి దాకా మారుతి 8 లక్షల యూనిట్లను అమ్మగా దేశంలో 7.22 లక్షల యూనిట్లను విక్రయించినట్లు వివరించారు. ఈ ఆర్థిక సంవత్సరంలో 10 లక్షల కార్లను ఉత్పత్తి చేసి 8.4 లక్షల కార్లను అమ్ముతామనే ధీమాను వ్యక్తం చేశారు.