రాజ్‌కోట్‌ : వేసవి కాలం రావడానికి మరికొంత సమయమున్నప్పటికీ నీటి వనరులు అంతగా లేని గుజరాత్‌లో పశు శిబిరాల ఏర్పాటు వేగంగా జరుగుతున్నది. ప్రత్యేకించి. దుర్భిక్ష కచ్‌ జిల్లాలో ఇప్పటికే 172 పశు శిబిరాలను స్వచ్ఛంద సంస్థలు ఏర్పాటు చేశాయి. ఈ శిబిరాలను స్థానికంగా ధోర్వాడాలని పిలుస్తారు. దాదాపు లక్షకు పైగా పశువులకు రక్షణ కల్పించేందుకు వీటిని ఏర్పాటు చేస్తున్నారు. కాగా ప్రభుత్వం మరో 119 గోశాలల ఏర్పాటుకు ఆర్థిక సహాయం అందచేస్తోంది. జిల్లాలో ఏర్పాటు చేసే గోశాలల్లో కూడా లక్షకు పైగా పశువుల సంరక్షణకు వీలు కలుగుతుంది. ఇటీవల కాలంలో దుర్భిక్ష పరిస్థితులను ఎదుర్కొంటున్న జిల్లా అధికారులు చెప్పిన వివరాల మేరకు ఈ పశు శిబిరాలలో లక్షా 8 వేల 442 పశువులు ఆశ్రయం పొందనున్నాయి. ప్రభుత్వం ఏర్పాటు చేస్తున్న 119 గోశాలల్లో 1,04,215 పశువులు తలదాచుకుంటాయని అధికారులు తెలిపారు. వేసవి గడుస్తున్న కొద్దీ శిబిరాల సంఖ్య 250కి పెరగవచ్చునని కచ్‌ డిప్యూటి కలెక్టర్‌ నియాజ్‌ పఠాన్‌ తెలిపారు. జిల్లాలోని 10 తాలూకాలను దుర్భిక్ష ప్రాంతాలుగా ప్రభుత్వం ప్రకటించింది . ఈ ప్రాంతాలలో గత వర్షాకాలంలో 25 సెంటీమీటర్ల కన్నా తక్కువ వర్షపాతం నమోదయ్యింది.