- వైఎస్‌ జగన్మోహన్‌రెడ్డి
- నష్టాల్లోని విద్యుత్‌ కంపెనీలకు అవార్డులా?
- రైన్‌గన్ల పేరిట ప్రజాధనం వృథా
ప్రజాశక్తి - అమరావతి బ్యూరో :
          పవిత్ర దేవాలయమైన అసెంబ్లీలో ముఖ్యమంత్రి చంద్రబాబునాయుడు చెపుతున్నదంతా ఒట్టి గ్యాసేనని ప్రతిపక్ష వైసిపి నేత వైఎస్‌ జగన్మోహన్‌రెడ్డి విమర్శించారు. సిఎం ఒక్కటి కూడా నిజం మాట్లాడటం లేదని, ప్రసంగమంతా అబద్ధాల పుట్టని వ్యాఖ్యానించారు. గవర్నర్‌ ప్రసంగానికి ధన్యవాదాలు తెలిపే తీర్మానంపై సోమవారం శాసనసభలో అధికార, ప్రతిపక్ష సభ్యుల మధ్య వాదోపవాదాలు సాగాయి. సిఎం ప్రసంగానంతరం జగన్‌ మాట్లాడుతూ సిఎం అబద్ధాలను నిజం చేసే ప్రయత్నం చేశారన్నారు. ఆంధ్రప్రదేశ్‌ను ఎంతో అభివృద్ధి చేస్తున్నట్టు సిఎం చెప్పుకుంటున్నారని, ఎన్‌సిఏఐఆర్‌ రిపోర్టు ప్రకారం అవినీతిలో మన రాష్ట్రమే ప్రథమ స్థానంలో ఉందని, దీనికి ప్రభుత్వం సిగ్గుపడాలని విమర్శించారు. అసెంబ్లీలో తప్పుడు లెక్కల చెపుతున్నది, అంకెల గారడీలతో ప్రజలను తప్పుదోవ పట్టిస్తున్నదీ ప్రభుత్వమేనన్నారు. 'స్టేట్‌ రిక్వెస్ట్‌'తో పోలవరం ప్రాజెక్టు పనులను రాష్ట్రానికే ఇస్తున్నట్టు కేంద్ర మంత్రి అరుణ్‌ జైట్లీ రాసిన లెటర్‌లో పేర్కొంటే, తామేమీ కేంద్రాన్ని అడగ లేదని, కేంద్రమే పోలవరం ప్రాజెక్టును ఇచ్చిందని సిఎం అబద్ధాలు చెపుతున్నారని విమర్శించారు. రాష్ట్రంలోని ఉన్న రెండు పవర్‌ కంపెనీలూ వేల కోట్ల నష్టాల్లో ఉంటే వాటికి అవార్డులు ఎలా వస్తాయని ప్రశ్నించారు. 2014-15లో బిప్లస్‌ గ్రేడ్‌లో ఉన్న ఇపి డిపిసిఎల్‌, ఎస్‌పి డిపిసిఎల్‌ పవర్‌ కంపెనీలు 2015-16లో బి గ్రేడ్‌కు పడిపోయాయన్నారు. ఈ కంపెనీలు రూ.3,900 కోట్ల నష్టాల్లో కూరుకొనిపోయాయన్నారు. రెయిన్‌గన్‌ల పేరుతో కోట్లాది రూపాయల ప్రజాధనాన్ని వృథా చేశారన్నారు. ఎస్సీ, ఎస్టీలతో పాటు బిసి, మైనారిటీ వర్గాలకు కేటాయించిన నిధులను ఖర్చు చేయడంలోనూ తప్పుడు లెక్కలు చూపిస్తున్నారని విమర్శించారు. కాపు కార్పొరేషన్‌కు కేటాయించిన నిధుల్లో కేవలం రూ.338 కోట్లే ఖర్చు చేశారన్నారు. కాపులకు రిజర్వేషన్‌ కోసం ఏర్పాటు చేసిన జస్టిస్‌ మంజునాథ్‌ కమిషన్‌ ఏమైందని నిలదీశారు. నిరుద్యోగ భృతిని ఇస్తామనే హామీ అమలులో ప్రభుత్వం ఘోరంగా విఫలమైందన్నారు.