న్యూఢిల్లీ : భారత్‌ తన ఇల్లు అని, తాను కూడా ఈ దేశ పుత్రికనే అని, తనకు ప్రభుత్వం శాశ్వత నివాస అనుమతి ఇస్తారని ఆశిస్తున్నట్లు బంగ్లాదేశీ రచయిత్రి తస్లీమా నస్రీన్‌ పేర్కొన్నారు. ప్రతి సంవత్సరం నివాస అనుమతి కోసం ఆందోళన చెందాల్సిన పరిస్థితి లేకుంటే బాగుంటుందని ఆమె అన్నారు. నస్రీన్‌కు భారత్‌లో మరో ఏడాది పాటు నివాసం ఉండేందుకు అనుమతి ఇస్తున్నట్లు కేంద్ర హోంశాఖ వర్గాలు ఆదివారం తెలిపాయి. దీనిపై నస్రీన్‌ సోమవారం ఒక మీడియా సంస్థకు ఇచ్చిన ఇంటర్వ్యూలో మాట్లాడుతూ అధికారులు తనకు శాశ్వత నివాస అనుమతి ఇస్తారన్న ఆశాభావం వ్యక్తం చేశారు. 5 లేదా 10 సంవత్సరాలకు ఒకసారి ఈ నివాస అనుమతిని కూడా జారీ చేసే అవకాశం ఉందన్నారు. భారత్‌లోనే తన శేష జీవితం గడపాలనుకుంటున్నానని, అందుకు అనుమతి ఇవ్వాలని 2014లోనే అప్పటి హోంమంత్రి రాజ్‌నాధ్‌సింగ్‌ను కోరినట్లు తెలిపారు. ' నన్ను అందరూ విదేశీయురాలిగా పిలుస్తున్నా, నేను మాత్రం భారత్‌కు చెందిన వ్యక్తిగానే భావిస్తున్నాను. శాశ్వత నివాస అనుమతి కోసం తన అభ్యర్థనను ప్రభుత్వం పరిగణనలోకి తీసుకుంటుందని అనుకుంటున్నాను. ఢిల్లీలోనే నాకు ప్రశాంతంగా, ఆనందంగా ఉంటుంది' అని అన్నారు. స్వీడన్‌ దేశ పౌరసత్వం కలిగిన తస్లీమా నస్రీన్‌ 2004 నుంచి నివాస అనుమతి పొందుతూ భారత్‌తో నివసిస్తున్నారు.