పశ్చిమ బెంగాల్ డాక్టర్లు సమ్మె ముగించాలని నిర్ణయించారు. ఎన్ఆర్ఎస్ హాస్పిటల్లో తమ సహచరులను కొట్టడాన్ని వ్యతిరేకిస్తూ సమ్మెకి వెళ్లిన డాక్టర్లతో ముఖ్యమంత్రి మమతా బెనర్జీ మీడియా ముందు సమావేశం అయ్యారు. విధి నిర్వహణ సమయంలో తమకు భయమేస్తోందని డాక్టర్లు సీఎంకి చెప్పారు. దీనికి డాక్టర్లకు రక్షణ కల్పిస్తామని మమత హామీ ఇచ్చారు. ప్రతి ఆస్పత్రిలో ఒక పోలీస్ అధికారిని నియమిస్తామని తెలిపారు. ఎన్ఆర్ఎస్ హాస్పటల్లో డాక్టర్లపై దాడి చేసిన వారికి కఠిన శిక్ష విధించాలని డాక్టర్ల ప్రతినిధి బృందం ఆమెను కోరింది. దాడి చేసిన ఐదుగురిని అరెస్ట్ చేసినట్టు ముఖ్యమంత్రి వారికి చెప్పారు. ఏ డాక్టర్ పైనా బెంగాల్ ప్రభుత్వం కేసు పెట్టలేదని, ప్రతి ప్రభుత్వాసుపత్రిలో గ్రీవెన్స్ రిడ్రెసల్ సెల్ ఏర్పాటు చేయనున్నట్టు ప్రకటించారు. మౌలిక వసతుల ఏర్పాటుకు బడ్జెట్ లేకపోవడం, రాష్ట్రంలో డాక్టర్ల కొరత సమస్యలు వేధిస్తున్నాయని సీఎం అన్నారు. డాక్టర్లు సురక్షితంగా పనిచేసేందుకు అవసరమైన అన్ని చర్యలు తీసుకుంటామని, సమ్మె కారణంగా ప్రజలు ఇబ్బందులు పడుతున్నందువల్ల విధుల్లో తిరిగి చేరాల్సిందిగా మమత డాక్టర్లకు సూచించారు.