లాహోర్‌: పాక్‌ ప్రధాని ఇమ్రాన్‌ఖాన్‌ గురువారం తన కేబినెట్‌ను పునర్వ్యీస్థీకరించిన నేపథ్యంలో ఆర్థిక మంత్రి అసద్‌ ఉమర్‌ తన పదవికి రాజీనామా చేశారు. ప్రధాని తనను ఆర్థిక శాఖకు బదులుగా విద్యుత్‌శాఖ బాధ్యతలు స్వీకరించమన్నారని, అయితే ఇందుకు తాను నిరాకరిస్తూ అసలు మంత్రి పదవినే నిరాకరించానని ఉమర్‌ గురువారం ఒక ట్వీట్‌లో వివరించారు. ఆయన స్థానంలో అబ్దుల్‌ హఫీజ్‌ షేక్‌ ఆర్థిక సలహాదారుగా నియమితులయ్యారు. పెట్రోలియం మంత్రి గులాం సర్వర్‌ఖాన్‌ను కూడా ఇమ్రాన్‌ రాజీనామా కోరినప్పటికీ ఆయన అందుకు నిరాకరించారని ప్రభుత్వ వర్గాలు తెలిపాయి. తనను రాజీనామా కోసం బలవంతంచేస్తే పార్టీ నుండే తప్పుకుంటానని ఆయన హెచ్చరించినట్లు తెలుస్తోంది. కాగా ప్రధాని ఇమ్రాన్‌ ఆయన్ను ఇప్పుడు పౌరవిమానయానశాఖకు బదిలీ చేశారు. ఇంకా పలువురు మంత్రుల శాఖలను మార్చిన ప్రధాని ఇమ్రాన్‌ తన మంత్రివర్గాన్ని పూర్తి స్థాయిలో ప్రక్షాళన చేసినట్లు తెలుస్తోంది.