బెంగళూరు : రానున్న సార్వత్రిక ఎన్నికల్లో మోడీ నేతృత్వంలోని బిజెపిని గద్దెదించేందుకు ప్రతిపక్షాలు కూటమి కట్టినప్పటికీ, ప్రధాని అభ్యర్థిపై ఎటువంటి ప్రకటన చేయలేదు. అయితే ఈ మేలో జరిగే ఎన్నికల్లో తమ కూటమి గెలిచిన అనంతరం కాంగ్రెస్‌ అధ్యక్షుడు రాహుల్‌ గాంధీనే ప్రధాని పీఠాన్ని అధిరోహించాలని భావిస్తున్నట్లు కర్ణాటకలోని సంకీర్ణ ప్రభుత్వంలోని జెడిఎస్‌ పార్టీ తన మనసులో మాటను బయటపెట్టింది. ఆ లక్ష్యాన్ని చేరుకునేందుకు తాము నిరంతరం కృషి చేస్తామని ముఖ్యమంత్రి కుమారస్వామి అన్నారు. అయితే గతంలో ఆ పదవికి పశ్చిమబెంగాల్‌ ముఖ్యమంత్రి మమతా బెనర్జీ సరైన అభ్యర్థి అని కూడా వ్యాఖ్యానించారు. ఆ పదవికి రాహుల్‌ అర్హుడని, ప్రధాని అభ్యర్థిగా ఆయనకు మద్దతునిస్తామని కుమారస్వామి వెల్లడించారు. తన తండ్రి, మాజీ ప్రధాని దేవేగౌడ కూడా అదే భావనలో ఉన్నారని అన్నారు. బిజెపితో పోల్చుకుంటే ప్రాంతీయ పార్టీలు పాటు పలువురు సమర్థవంతమైన నేతలు ఉన్నారని, మమతా బెనర్జీ, మాయవతి లాంటి వారు ప్రధాని పదవికి అర్హులేనని, కానీ తమ పార్టీ మాత్రం రాహుల్‌కే పట్టం కట్టాలని భావిస్తున్నట్లు ఓ ఇంటర్వ్యూలో తెలిపారు. ఆయనకు ప్రధాని పదవికి సమర్ధుడేనా అన్న సందేహాలపై మాట్లాడుతూ మోడీ కన్నా రాహుల్‌ ఏదైనా చేయగలడని ధీమా వ్యక్తం చేశారు. మోడీ 'పేపర్‌ టైగర్‌' మాత్రమే అని, రాహుల్‌ పరిపక్వం చెందిన రాజకీయ నేతని అన్నారు. మోడీ మంచి మాటకారి అయినప్పటికీ, ఈ నాలుగున్నరేళ్లలో చేసిందేమిటని ప్రశ్నించారు.