బీజింగ్‌ : వసంతోత్సవ వేడుకలకు చైనా సిద్ధమవుతోంది. చైనా నూతన సంవత్సరం ఫిబ్రవరి 5న ప్రారంభమవుతోంది. ఈ కొత్త సంవత్సర వేడుకల కోసం లక్షలాది మంది చైనీయులు తమ కుటుంబాలతో కలిసి స్వస్థలాకు వెళతారు. జనవరి 21 నుండి మార్చి 1వ తేదీ వరకు సాగే ఈ సంబరాల్లో పాల్గనే ప్రజల కోసం, ఆ రద్దీని తట్టుకునేందుకు రవాణా అధికారులు చర్యలు తీసుకుంటున్నారు. గతేడాదితో పోలిస్తే ఈ ఏడాది ప్రయాణికుల రద్దీ 0.6శాతం పెరుగుతుందని అంచనా వేశారు. రైల్వే ట్రిప్పుల్లో 8.3శాతం, విమానాల ట్రిప్పుల్లో 12శాతం పెరుగుదల వుంటుందని భావిస్తున్నారు. విమాన రద్దీని తట్టుకునేందుకు షాంఘై అంతర్జాతీయ విమానాశ్రయంతో సహా 10 పెద్ద విమానాశ్రయాల్లో దేశీయ విమానాల రాకపోకలను పెంచాలని, విస్తరించాలని పౌర విమానయాన అధికారులు భావిస్తున్నారు. మొత్తంగా 5,32,000 విమానాల రాకపోకలను సిద్ధం చేస్తున్నారు. ప్రతి రోజూ 4860 రైలు సర్వీసులను కూడా రెడీ చేస్తున్నారు. ప్రయాణికుల అవసరాలను దృష్టిలో వుంచుకుని కొన్ని రైల్వే స్టేషన్లు టిక్కెట్‌ లేకుండా ప్రయాణాలను అనుమతిస్తున్నాయి.