పశ్చిమ బెంగాల్ లో బీజేపీ అధ్యక్షుడు అమిత్ షా రథయాత్ర చేపట్టడానికి వీల్లేదని సుప్రీంకోర్ట్ స్పష్టం చేసింది. రథయాత్రపై పశ్చిమ బెంగాల్ తెలిపిన అభ్యంతరాలు అబద్ధం కాదని అభిప్రాయపడింది. మరోసారి రాష్ట్ర ప్రభుత్వం నుంచి అనుమతి పొందాలని కోర్టు బీజేపీకి సూచించింది. అయితే రాష్ట్రంలో బీజేపీ ర్యాలీలు, సభలు నిర్వహించుకొనేందుకు అనుమతించాలని కోర్టు బెంగాల్ ప్రభుత్వాన్ని ఆదేశించింది. రథ యాత్ర చేపట్టేందుకు అనుమతి ఇవ్వాలని కోరుతూ బీజేపీ రాష్ట్ర విభాగం దాఖలు చేసిన పిటిషన్ ను అత్యున్నత న్యాయస్థానం విచారించింది. ఈ ఏడాది జరగబోయే సాధారణ ఎన్నికలకు ముందు రాష్ట్రంలోని 42 పార్లమెంటరీ స్థానాలను కవర్ చేస్తూ రథయాత్ర చేపట్టాలని బీజేపీ నిర్ణయించింది. యాత్రకు అనుమతించడాన్ని తోసిపుచ్చిన కలకత్తా హైకోర్ట్ ఉత్తర్వులను బీజేపీ సవాల్ చేసింది. రాష్ట్రంలో మత ఘర్షణలను ఎగదోస్తుందనే కారణంతో రాష్ట్ర ప్రభుత్వం రథయాత్రకు అనుమతి నిరాకరించింది.