ప్రజాశక్తి-విజయనగరం : జిల్లాలో ఆర్థికంగా వెనుకబడిన తరగతులకు చెందిన 5,546 మందికి మహిళలకు ముఖ్యమంత్రి వైఎస్‌ జగన్మోహన రెడ్డి గురువారం రూ.831.90 లక్షలను విడుదల చేశారు. నంద్యాల జిల్లా బనగానపల్లె లో జరిగిన ఈ కార్యక్రమంలో, ముఖ్యమంత్రి జగన్‌ మోహన రెడ్డి బటన్‌ నొక్కి లబ్ధిదారుల బ్యాంకు ఖాతాల్లో నేరుగా జమ చేశారు. జిల్లాలో ఈ కార్యక్రమాన్ని ప్రత్యక్ష ప్రసారం చేసిన అనంతరం కలెక్టర్‌ నాగలక్ష్మి లబ్ధిదారులకు ఈ మొత్తానికి సంభందించిన చెక్కును అందజేశారు. రెడ్డి, కమ్మ, క్షత్రియ, బ్రాహ్మణ, వెలమ ఇతర ఒసి కులాలకు చెందిన 45-60 సంవత్సరాల పేద మహిళల ఆర్థికాభివృద్ధికి, సాధికారతకు ప్రభుత్వం ఈ పథకాన్ని అమలు చేస్తోంది. ఈ పథకం కింద ఏటా రూ.15 వేల ఆర్థిక సాయాన్ని అందిస్తోంది. దీనికింద 2021-22 సంవత్సరంలో 4,972 మందికి రూ.745.80 లక్షలు, 2022-23 లో 5,738 మందికి రూ.860.70 లక్షలు అందజేశారు. ఈ ఏడాదికి గాను 5,546 మందికి రూ.831.90 లక్షలను విడుదల చేశారు. కార్యక్రమంలో జిల్లా కలెక్టర్‌ నాగలక్ష్మితో బాటు, జిల్లా వెనుకబడిన తరగతుల సేవా సహకార సంఘం ఇడి పెంటోజిరావు, రెడ్డిక కార్పొరేషన్‌ డైరెక్టర్‌ భాస్కరరావు, కార్పొరేషన్‌ అధికారులు, సిబ్బంది, లబ్ధిదారులు పాల్గొన్నారు.
తాజా వార్తలు
