- ట్రంప్‌కు ఘాటైన కౌంటర్‌ ఇచ్చిన అటార్నీ జనరల్‌
వాషింగ్టన్‌: ఎలాంటి రాజకీయ ఒత్తిళ్లకు తాను తలొగ్గనని అమెరికా అటార్నీ జనరల్‌ జెఫ్‌ సెషన్స్‌ అధ్యక్షుడు ట్రంప్‌కు ఘాటైన సమాధానమిచ్చారు. తన నేతృత్వంలోని బృందం పారదర్శకంగా, నిజాయితీగా పనిచేస్తుందని అన్నారు. జెఫ్‌ సెషన్స్‌ న్యాయశాఖపై పట్టు సాధించలేకపోతున్నారని ఫాక్స్‌మీడియా సంస్థకు ఇచ్చిన ఇంటర్వ్యూలో ట్రంప్‌ పేర్కొన్నారు. ఈ నేపథ్యంలో సెషన్స్‌ పైవిధంగా తీవ్రస్థాయిలో స్పందించారు. 2016లో జరిగిన అమెరికా అధ్యక్ష ఎన్నికల్లో రష్యా జోక్యం చేసుకుందనే ఆరోపణలు వినిపిస్తున్నాయి. ఈ కేసు విచారణ విషయంలో న్యాయశాఖ పనితీరుపై ట్రంప్‌ తీవ్ర అసంతృప్తితో ఉన్నారు. ఈ నేపథ్యంలోనే ఆయన ఆ శాఖపై తీవ్రస్థాయిలో మండిపడడం, అటార్నీ జనరల్‌ అందుకు ప్రతిస్పందించడం జరిగాయి. ట్రంప్‌ అధ్యక్షుడు కావడానికి ముందు ఆయన ప్రచారానికి మద్దతుగా నిలిచిన సెషన్స్‌ 'రష్యా జోక్యం' కేసు విచారణ నుంచి తప్పుకొని తన డిప్యూటీ రాడ్‌ రోజెన్‌స్టీన్‌కు అప్పగించారు. ప్రస్తుతం స్పెషల్ కౌన్సెల్‌ రాబర్ట్‌ మ్యూలర్‌ నేతృత్వంలో దర్యాప్తు సాగుతోంది. ఈ కేసు విచారణకు ట్రంప్‌ ఆటంకాలు కల్పిస్తున్నారా అనే కోణంలో మ్యూలర్‌ దర్యాప్తు చేస్తున్నారని వినిపిస్తోంది. దీంతో సెషన్స్‌.. విచారణ నుంచి తప్పుకొని వీరికి అప్పగించడంపై ట్రంప్‌ తరచూ మండిపడుతున్నారు.
ట్రంప్‌ తీరుపై సొంత పార్టీ నేతల నుంచి భిన్నాభిప్రాయాలు వ్యక్తమవుతున్నాయి. అటార్నీ జనరల్‌ విషయంలో ట్రంప్‌ అనుసరిస్తున్న ధోరణి సరికాదని, తాము అటార్నీ జనరల్‌ పక్షం వహిస్తామని పలువురు రిపబ్లికన్‌లు చెబుతున్నారు. ఆ పార్టీకి చెందిన ఇద్దరు కీలక సెనేటర్లు మాత్రం నవంబరులో జరగబోయే మధ్యంతర ఎన్నికల తరువాత ట్రంప్‌.. సెషన్స్‌పై ఎలాంటి చర్యలకు పాల్పడినా అప్పుడు తామంతా మద్దతుగా నిలుస్తామని పేర్కొన్నారు.
ట్రంప్‌-అటార్ని జనరల్‌ వివాదం
గత కొద్ది రోజులుగా అమెరికా అధ్యక్ష ఎన్నికల్లో రష్యా జోక్యం కేసు విచారణతో సంబంధం ఉండేలా పలు పరిణామాలు చోటు చేసుకున్నాయి. ట్రంప్‌ క్యాంపెయిన్‌ మాజీ మేనేజర్‌ పాల్‌ మనాఫోర్ట్‌ పన్నులు, బ్యాంకులను మోసగించిన కేసుల్లో నిందితుడిగా తేలారు. మరోవైపు పన్ను ఎగవేత, బ్యాంకులను మోసగించడం, ప్రచార ఆర్థిక వ్యవహారాల నిబంధనల ఉల్లంఘన విషయంలో ట్రంప్‌ మాజీ వ్యక్తిగత న్యాయవాది మైఖేల్‌ కోహెన్‌ తన నేరాన్ని అంగీకరించారు. ట్రంప్‌తో తమకు శృంగార సంబంధాలున్నాయని ఆరోపించిన ఇద్దరు మహిళల నోరు మూయించేందుకు వారికి రహస్యంగా డబ్బు చెల్లించాలని ట్రంప్‌ తనకు సూచించారని కోహెన్‌ తన వాంగ్మూలంలో చెప్పారు. ఇది ప్రచార ఆర్థిక వ్యవహారాల నిబంధనల ఉల్లంఘన కిందికొస్తుంది.. అయితే, ట్రంప్‌ మాత్రం తానేమీ చట్టాలను ఉల్లంఘించలేదంటూ ఈ ఆరోపణలను ఖండిస్తున్నారు. ఇలా వరుస న్యాయ వివాదాలు, ఆరోపణల్లో చిక్కుకుంటుండడంతో ట్రంప్‌ ఆగ్రహానికి గురవుతున్నారు. అయితే, దేశంలో సంక్షోభం తలెత్తనుందని భావిస్తే తప్ప న్యాయశాఖ సాధారణంగా అధ్యక్షుడికి వ్యతిరేకంగా అభియోగాలు మోపకపోవచ్చు. అలాగే, మధ్యంతర ఎన్నికలకు ముందు ట్రంప్‌ ప్రత్యర్థులు ఆయనపై అభిశంసన అస్త్రాన్నీ ప్రయోగించే అవకాశాలు లేవన్నది పలువురి మాట.
