పారాక్లైంబింగ్‌లో భారత్‌ పేరు ఎక్కించాడు మణికందన్‌ కుమార్‌. ఐదేళ్లపుడు పోలియో బారిన పడిన ఈ విభిన్న ప్రతిభావంతుడు ఆ తర్వాత కొండల్ని ఎగబాకే క్రీడనే జీవితంగా చేసుకుని విజేతగా మారాడు. అస్సలు ఊహించని రంగంలో భారత్‌కు పతకాల పంట పండించాడు. ప్రపంచ చాంపియన్‌గా నిలిచి భారత్‌ ఖ్యాతి ఉన్నత శిఖరాన్ని ఎక్కించాడు. ఈ విజేత చేతి పట్టు, గుండె బలమే అతడి కెరీర్‌ను పైపైకి తీసుకెళుతోంది. రానున్న 2020 టోక్యో ఒలింపిక్స్‌లో పారాక్లైంబింగ్‌ కూడా చేరడంతో దేశానికి ఓ ఒలింపిక్‌ పతకం మణికందన్‌ నుంచి ఖాయంగా కనిపిస్తోంది.
మణికందన్‌ కుటుంబం బెంగళూర్‌లోని మల్లేశ్వరానికి చెందినది. తల్లి అగర్‌బత్తీలు తయారుచేసే పనికి వెళుతుంది. తండ్రి ఓ కార్పెంటర్‌. అతడికి ఐదేళ్లపుడే పోలియో వల్ల కుడికాలు పాడైంది. సరిగ్గా నడవడానికి కూడా ఇబ్బంది పెట్టే శరీర బలహీనతను ఎలా అయినా జయించాలనుకునేవాడు. తన స్నేహితులు మైదానంలో చురుగ్గా ఆడుకునే దృశ్యం మణికందన్‌ను క్రీడలపై ఆసక్తి కలిగించింది. కానీ, తల్లిదండ్రులు ఎక్కడ గాయాలపాలవుతాడోనని అడ్డుచెప్పేవాళ్లు. పూర్తిగా చదువుకే అంకితమైతే పెద్ద ఉద్యోగం వచ్చి ఇబ్బందులు లేకుండా ఉంటాయని చెప్పేవాళ్లు. తల్లిదండ్రుల ఆర్థిక పరిస్థితి గురించి పూర్తి అవగాహన ఉన్న మణికందన్‌ ఇంజినీర్‌ అవుదామనుకున్నాడు. ఖాళీ సమయాల్లో ఫుట్‌బాల్‌ను విడిచేవాడు కాదు. కానీ పదో తరగతి సెలవులు అతడి జీవితాన్ని మలుపుతిప్పాయి. 2001 పరీక్షల్లో తప్పడంతో పూర్తిగా దిగాలు పడిన మణికందన్‌ స్కూల్‌ ట్రిప్‌లో రామ్‌నగర్‌ వెళ్లాడు. అక్కడ ఉన్న ఓ కొండపైకి ఓ విభిన్న ప్రతిభావంతుడు తాళ్ల సాయంతో ఎక్కేందుకు ప్రయత్నిస్తున్నాడు. ఆ దృశ్యం మణికందన్‌ను ఆలోచనలో పడేసింది. తాను కూడా పేరు తెలీని ఆ ఆట ఆడాలని నిర్ణయించుకున్నాడు. అప్పటికీ పారాక్లైంబింగ్‌ అనేది దేశంలో అంతగా తెలీని క్రీడ. దీనికి భవిష్యత్తు ఉందో లేదోనని తండ్రి అడ్డుచెప్పి తనతో పాటు పనికి రమ్మని కోరాడు. కానీ ఒక్క అవకాశం తీసుకుని అప్పటి క్లైంబింగ్‌ పోటీల్లో పాల్గొని టాప్‌లో నిలిచాడు. మిగతా పదిమంది కూడా సాధారణ కైంబర్లే. అలా తండ్రిని మెప్పించి ఓ ఇన్‌స్ట్రక్టర్‌ సాయంతో బెంగళూరులోని రాష్ట్ర యువ కేంద్రంలోని స్పోర్ట్‌ క్లైంబింగ్‌ వాల్‌ వద్ద శిక్షణకు చేరాడు. ఆ తర్వాత వరస విజయాలతో సంచలనంగా మారాడు. 2003లో బెంగళూరు చాంపియన్‌షిప్‌లో విజేతగా నిలవడంతో మణికందన్‌కు ఉత్తమ క్లైంబర్‌గా జాతీయ అవార్డు వచ్చింది. అలా వివిధ దేశవాళీ పోటీల్లో పాల్గొంటూ మొత్తం 11 పతకాలను సాధించాడు. రోజుకు ఆరుగంటల పాటు ప్రాక్టీస్‌ చేసే మణికందన్‌ ప్రతిభ ప్రపంచానికి తెలిసింది ప్రపంచ చాంపియన్‌షిప్‌ ద్వారానే. 2012లో తన కెరీర్‌ శిఖరాగ్రాన్ని అందుకుంది.
పతకాల పంట
తొలిసారి ఫ్రాన్స్‌ పారాక్లైంబింగ్‌ వరల్డ్‌ చాంపియన్‌షిప్‌లో స్వర్ణం సాధించాడు. ఆ మరుసటి ఏడాదే ఇటలీ, ఇంగ్లండ్‌ వరల్డ్‌ కప్‌ల్లో రజతాన్ని కైవసం చేసుకున్నాడు. 2014 సీజన్‌లో ఫ్రాన్స్‌లో 6వ స్థానంలో నిలబడితే, స్పెయిన్‌, యూకే, ఆస్ట్రియా ప్రపంచ కప్‌ల్లో రజత పతకాలు సాధించాడు. 2015లో ఆస్ట్రియాలో స్వర్ణంతో తనకు తిరుగులేదని చాటాడు. అదే ఏడాది ఫ్రాన్స్‌లో మళ్లీ రజతం చేజిక్కుంచుకున్నాడు. స్పెయిన్‌కు చెందిన రామొన్‌ జులియన్‌నే స్ఫూర్తిగా భావించిన మణికందన్‌ అతడి స్థాయిలో ప్రదర్శన ఇచ్చాడు. 2016 సర్క్యూట్‌లో నాలుగింటిలో మూడింటిని గెలిచాడు. యూకే ప్రపంచకప్‌ స్వర్ణాన్ని అందుకున్నాడు. ఈ ఏడాది కూడా 6 పారాక్లైంబింగ్‌ ప్రపంచ కప్‌ల్లో మణికందన్‌ అద్భుత ప్రదర్శన ఇచ్చాడు. జపాన్‌, కెనడా, యూరప్‌ల్లోని వాల్‌ల వద్ద శిక్షణ తీసుకుంటే టోక్యోలో పతకం ఖాయమని కోచ్‌లు చెబుతున్నారు. భారత్‌కు ఒలింపిక్‌ పతకాన్ని తెచ్చే వీరుడిగా మణికందన్‌ పేరు ఇప్పుడే రాసేసుకోవచ్చని అతడి కోచ్‌ల గట్టి విశ్వాసం. ్య
