భావాల ధాటికి చిట్లిపోయిన నరాలు 
నెత్తుటి సిరాగా 
కలంలో ప్రవహిస్తున్నప్పుడు ...
అక్షరాల శబ్దానికి 
విస్ఫోటనమై పోయిన భావాలు 
శిధిల శకలాలుగా 
కాగితంపై కుప్పకూలుతున్నప్పుడు ...
అనుభవాల ప్రకంపానికి 
విచ్ఛిన్నమైపోయిన సంఘటనలు 
బాధల స్మృతులుగా 
కాలం వేదికపై కదలాడుతున్నప్పుడు ...
శ్రమజీవుల రెక్కల కష్టానికి 
విచ్ఛిన్నమైపోయిన ఊపిరి సెగలు 
స్వేదబిందువులుగా 
బతుకుచిత్రంపై ఆవిరౌతున్నప్పుడు ...
మృగాల యాసిడ్‌ దాడికి 
దహనమైపోయిన శరీర భాగాలు 
సమాధి గోడలుగా 
సభ్యసమాజాన్ని ప్రశ్నిస్తున్నప్పుడు ...
సేద్యకారుడి పంట నష్టానికి 
పగిలిపోయిన ఆశల గుండెలు 
అశ్రు సముద్రాలుగా
సంసార నౌకను ముంచేస్తున్నప్పుడు ...
వేదనల తీవ్రతకు 
ముక్కలైపోయిన జీవితాలు 
నిస్సహాయ నిట్టూర్పులుగా 
జీవన యానంలో కొనసాగుతున్నప్పుడు ...
కవిత దానికదే పుడుతుంది 
అక్కున చేర్చుకొని ఓదారుస్తుంది !

- పి లక్ష్మణ్‌ రావ్‌ సెల్‌ : 9441215989

పెళ్లి సంబంధం కోసం వెతుకుతున్నారా?... అందుకు సరైన వేదిక‘ప్రజాశక్తి పెళ్లిపుస్తకం’. వెంటనే రిజిస్టర్ చేసుకోండి - రిజిస్ట్రేషన్ ఉచితం