మాస్‌ మసాలా సినిమాలకు పెట్టింది పేరు రవితేజ. 'సోగ్గాడే చిన్నినాయనా'.. 'రారండోరు వేడుక చూద్దాం' చిత్రాలతో దర్శకుడిగా మంచి విజయాలందుకున్న వ్యక్తి కల్యాణ్‌ కృష్ణ. వీరి కాంబినేషన్‌లో వచ్చిన చిత్రం 'నేల టిక్కెట్టు'. నేటి తరానికి నేలటిక్కెట్‌పై సినిమా చూస్తే ఎలా ఉంటుందో ఆ అనుభూతిని ప్రేక్షకులకు చూపించడానికి ఆ టైటిల్‌తో రామ్‌ తాళ్ళూరి ఈ చిత్రాన్ని నిర్మించారు. శుక్రవారమే విడుదలైంది. ఈ చిత్రంలో హీరో దేనికి స్పందిస్తాడో అదే చేస్తుంటాడు. రవితేజ అభిమానులకు కూడా రుచించనట్టు తీశారనిపించింది.
నటీనటులు : రవితేజ, మాళవిక శర్మ, జగపతిబాబు, సంపత్‌ రాజ్‌, అలీ, ప్రవీణ్‌, కౌముది, శరత్‌ బాబు, పోసాని కృష్ణమురళి, పృథ్వీ, బ్రహ్మానందం, జయప్రకాష్‌ రెడ్డి తదితరులు.
సాంకేతిక : ఛాయాగ్రహణం : ముకేష్‌, సంగీతం : శక్తికాంత్‌ కార్తీక్‌, నిర్మాత : రామ్‌ తాళ్ళూరి, రచన, దర్శకత్వం : కల్యాణ్‌ కృష్ణ కురసాల.
కథ : నేల టిక్కెట్టుగాడని పిలిపించుకునే రవితేజ ఓ అనాథ. ఎదుటివాడిలో బంధాన్ని చూసే గుణం అతనిది. అందుకే జనాలంటే పిచ్చి. చుట్టూ జనం ఉండాలి. మధ్యలో మనం ఉండాలి అనుకునే రకం తనది. దొంగసాక్షాలు చెబుతూ జీవనం సాగిస్తుంటాడు. అలాంటివాడు వృద్ధుల్ని మోసం చేస్తున్న ఓ సంస్థపై తిరగబడి వారికి న్యాయం చేస్తాడు. అది రాష్ట్ర హోం మంత్రి ఆదిత్య భూపతి (జగపతిబాబు)ది. అలా రెండుమూడు సంఘటనలు జరుగుతాయి. ఇదంతా కావాలనే చేస్తున్నట్లు మంత్రికి అర్థమయిపోతుంది. ఇంతకీ అతను హోం మంత్రిని ఎందుకు టార్గెట్‌ చేశాడు. అతడి గతం ఏమిటి? ఆ పోరాటంలో అతనెలా విజయం సాధించాడు అన్నది మిగతా కథ.
విశ్లేషణ : ఈ కథంతా చూస్తుంటే యాభై ఏళ్ళక్రితం నాటి జనరేషన్‌ థియేటర్లో నేల టిక్కెట్టులో చూసిన కథలా అనిపిస్తుంది. అందుకే దర్శకుడు ముందే ఆ టైటిల్‌ పెట్టాడు. కానీ ఇప్పటి జనరేషన్‌కు అవి సరిపడవనే విషయాన్ని మరిచాడు. ఫ్యామిలీ సెంటిమెంట్లు అందరికీ ఉంటాయి. చుట్టూ జనాలు బాగుండాలనేది అనాథగా బతికే క్యారెక్టర్‌కు అనిపించవచ్చు. ఎదుటి వ్యక్తిలో బంధాన్ని చూసే గుణం కలిగిఉండవచ్చు. ఇవన్నీ బాగానే ఉన్నా కోర్టులో దొంగసాక్షాలు చెప్పి బతకడంతో ఎదుటివ్యక్తికి అన్యాయం జరిగిందనే పాయింట్‌ను దర్శకుడు ఎందుకు విస్మరించాడో అర్థంకాదు. దానితో హీరో ఔచిత్యం దెబ్బతిన్నట్టు అయింది. సినిమా కథ కాబట్టి సన్నివేశాలపరంగా అనుకూలంగా రాసేసుకున్నాడని మిగిలిన సన్నివేశాలు చెప్పేస్తాయి. 'వృద్ధులు కుక్కలుకాదు. ఓ అనుభవం. లైట్‌హౌస్‌లాంటివాళ్లు.. మనకు దిక్చూచి..' వంటి బలమైన సంభాషణలు బాగున్నా.. వాటితో కథను మరో రకంగా హ్యాండిల్‌ చేస్తే సినిమా వేరే విధంగా ఉండేది. ఇప్పటి కొత్తదర్శకులు హీరోలు వినూత్నమైన ఆలోచనలతో లాజిక్కుతో ప్రేక్షకుల్ని కట్టిపడేస్తున్నారు. 'ఘాజీ', 'ఫిదా', 'రంగస్థలం'...ఇలా ఏ సినిమా అయితేనేమీ ఒక్కోటి ఒక్కో భిన్నమైన అంశం. ప్రేక్షకుల ఊహకు అందని పాయింట్లు. స్క్రీన్‌ప్లే కూడా అంతే ఆకర్షణీయంగా ఉంటుంది. అందుకే ఇప్పటి హీరోలు కథల్లో కొత్తదనాన్ని ఆశిస్తున్నారు. ప్రేక్షకులు మనకంటే తెలివిగలవాళ్ళని చెప్పే హీరోనే ఇటువంటి సినిమా చేశాడని మాత్రం అనిపించకూడదు. మాస్‌ హీరో అనే బ్రాండ్‌ కొన్ని కథలకే వర్కవుట్‌ అవుతుందనే విషయాన్ని విస్మరించకూడదు.
దర్శకుడి పరంగా చూస్తే... 'సోగ్గాడే చిన్నినాయనా'తో హీరో ఆలోచనలు కలగలిపి మంచి సక్సెస్‌ సాధించాడు. ఆ తర్వాత 'రారండోరు వేడుక చూద్దాం' అనే కాన్సెప్ట్‌ పాతదే అయినా ట్రీట్‌మెంట్‌ కొత్తగా చూపించి సక్సెస్‌ చేశాడు. కానీ 'నేల టిక్కెట్టు' అంటూ ఈ తరానికి తెలియని పాత రోజుల్లోని పదాన్ని టైటిల్‌గా పెట్టుకుని ఏదో కొత్తదనం చూపిస్తాడనుకున్న ప్రేక్షకులకి నిరాశ మిగిల్చాడు. కనీసం మాస్‌ ప్రేక్షకుల్ని అలరించే వినోదం కూడా లేకుండా.. చకచకా సినిమాటిక్‌గా సాగిపోయే అరిగిపోయిన కథ.. ఆసక్తి రేకెత్తించని కథనం.. బలహీనమైన, పేలవమైన పాత్రలు. లాజిక్‌ లేని అతకని సన్నివేశాలు.. ఇలా అన్ని రకాలుగా 'నేల టిక్కెట్టు' ఒక అర్థ రహితమైన సినిమాకు అచ్చమైన ఉదాహరణగా నిలుస్తుంది.
ఇక సినిమాలో ఎవరికే పని కావాలన్నా హీరోనే కావాలి. ఇలా అందరి సమస్యలు తీర్చడం తప్ప పనేమీ లేనట్లు 80లు.. 90ల నాటి కథానాయకుడి స్టయిల్లో చెలరేగిపోతుంటాడు హీరో. కట్‌ చేస్తే ముందు లైట్‌గా కనిపించి.. ఇంటర్వెల్‌ రాగానే హీరో ఒక ఉద్దేశం ప్రకారమే ఇదంతా చేస్తున్నాడని గత దశాబ్దం కాలంగా మనకు బాగా అలవాటైన ట్విస్టు ఒకటిస్తారు. ఇక ద్వితీయార్ధంలో ఆటోమేటిగ్గా హీరో ఫ్లాష్‌ బ్యాక్‌ చూస్తాం. వర్తమానంలోకి రాగానే హీరో-విలన్‌ ఎత్తులు పై ఎత్తులు వేసుకుని చివరగా కథను క్లైమాక్స్‌కు తీసుకెళ్లిపోతారు. ఇదీ పరమ రొటీన్‌గా సాగిపోయే 'నేల టిక్కెట్టు' వ్యవహారం. ఒక సీన్లో 'కమిషనర్‌ కూతుళ్లకు మొగుళ్లు రారా' అంటూ 'ఇడియట్‌' డైలాగ్‌ పేలుస్తాడు రవితేజ. ఆ సీన్లో కామెడీ కోసం రవితేజ అండ్‌ కో పడ్డ ప్రయాస చూసి.. 'ఇడియట్‌' రోజులు గుర్తు తెస్తాయి. హీరోయిన్‌ ప్రేమ పొందడానికి డాక్టర్‌గా మారి ఆమె ప్రేమ పొందడం కృతంగా అనిపిస్తుంది.
రవితేజ కొత్తగా చేసిందేమీ లేదు. అతనేదైనా చేయడానికి ఈ సినిమా ఎంతమాత్రం అవకాశం ఇవ్వలేదు. తనను అభిమానించేవారికీ నిరాశే ఉంటుంది. హీరోయిన్‌ మాళవిక శర్మ చూడ్డానికి బాగానే ఉంది కానీ పాత్రకు సూటవ్వలేదు. విలన్‌గా జగపతిబాబు పాత్ర గతంలో పోషించిన తరహానే ఉంది. వినోదాన్ని పండిచే పాత్రల్లో పృథ్వీ, జయప్రకాష్‌ రెడ్డి, అలీ, ప్రవీణ్‌, ప్రియదర్శి కన్పిస్తారు. విశేషం ఏమంటే.. బ్రహ్మానందం పాత్రను జూనియర్‌ ఆర్టిస్టులా ఒక్క డైలాగ్‌ లేకుండా రెండుమూడు సీన్లవరకే పరిమితం చేయడం.
సాంకేతికపరంగా చెప్పాలంటే 'ఫిదా'తో సత్తా చాటుకున్న సంగీత దర్శకుడు శక్తికాంత్‌ కార్తీక్‌కు ఈసారి తన ప్రతిభ చూపించే అవకాశం లేకపోయింది. ఇలాంటి సినిమాకు అతను సూటవ్వలేదనిపిస్తుంది. ఐలవ్యూ... అంటూ సాగే ఒక పాట బాగుంది కానీ.. అది సినిమాలో సెట్టవ్వలేదు. మాస్‌ బీట్స్‌ కోసం అతను చేసిన ప్రయత్నం ఏమాత్రం మెప్పించలేదు. బ్యాక్‌గ్రౌండ్‌ స్కోర్‌ కూడా మామూలే. ముకేష్‌ ఛాయాగ్రహణం ఓకే. సినిమాలో కొంచెం ప్రత్యేకంగా చెప్పుకోదగ్గ ఛేజింగ్‌ సీక్వెన్స్‌ బాగా చిత్రీకరించాడు. నేలటిక్కెట్‌గాడితో పెట్టుకొంటే నాకించేస్తాడనేది విలన్‌తో చెప్పిన డైలాగ్‌ అయినా... చూసే ప్రేక్షకుడు ఒక్కసారిగా కంగారుపడతాడు.
