- ఏర్పాట్లను పరిశీలించిన కలెక్టర్‌, ఎస్‌పి
ప్రజాశక్తి - పోలవరం :
              ఈనెల 20వ తేదీన ముఖ్యమంత్రి వైఎస్‌.జగన్మోహన్‌రెడ్డి పోలవరం ప్రాజెక్టు సందర్శన నేపథ్యంలో కట్టుదిట్టమైన భద్రతా ఏర్పాట్లు చేసినట్లు పశ్చిమగోదావరి జిల్లా కలెక్టర్‌ రేవు ముత్యాలరాజు తెలిపారు. ఈ మేరకు మంగళవారం సుమారు మూడు గంటలపాటు కలెక్టర్‌ పోలవరం ప్రాజెక్టు నిర్మాణ స్థలాన్ని సమగ్రంగా పరిశీలించారు. ముఖ్యమంత్రి ఉదయం 11.35 గంటల ప్రాంతంలో పోలవరం హెలీప్యాడ్‌ వద్దకు చేరుకోవచ్చని, అక్కడ నుండి ప్రాజెక్టు నిర్మాణ ప్రాంతాలను పరిశీలిస్తారని తెలిపారు. ప్రాజెక్టు వ్యూ పాయింట్‌, స్పిల్‌వే, ఎగువ కాపర్‌ డ్యామ్‌, దిగువ కాపర్‌డ్యామ్‌, స్పిల్‌ ఛానల్‌ గేట్ల తయారీ ప్రాంతాలను కలెక్టర్‌ పరిశీలించారు. ప్రాజెక్టు నిర్మాణ పనుల ప్రగతితీరుపై తీసుకోవాల్సిన చర్యలపై అధికారులతో ముఖ్యమంత్రి సమీక్షించనున్నారని, అందుకు తగినట్లు అధికారులు సిద్ధంగా ఉండాలని కలెక్టర్‌ ఆదేశించారు. ముఖ్యమంత్రి తొలుత జిల్లాలోని ఉండిలో జరిగే ఒక కార్యక్రమంలో పాల్గొన్న అనంతరం పోలవరం చేరుకుంటారు. కలెక్టర్‌ వెంట జెసి ఎం.వేణుగోపాల్‌రెడ్డి, జిల్లా ఎస్‌పి నవదీప్‌సింగ్‌, కెఆర్‌పురం ఐటిడిఎ పిఒ హరీంద్రియ ప్రసాద్‌, ప్రాజెక్టు చీఫ్‌ ఇంజినీర్‌ వి.శ్రీధర్‌, ఇరిగేషన్‌ ఎస్‌ఇ ఆర్‌.రఘునాథ్‌, జంగారెడ్డిగూడెం ఆర్‌డిఒ కె.మోహన్‌రావు, డిఎస్‌పిలు రవికుమార్‌, మురళీకష్ణ, విజయపాల్‌ పాల్గొన్నారు.